Права масовна тепачка избила на небото, уште на летот на „Биман Бангладеш ерлајнс“ на релација од Силхет за Лондон, кога обична вербална расправија помеѓу двајца мажи ескалирала во брутален физички судир меѓу седиштата, пред очите на шокираните патници меѓу кои имало и деца и постари лица.
Драматичната снимка брзо се рашири по социјалните мрежи, прикажувајќи како двајцата патници најпрво разменуваат навреди, а потоа започнуваат физички да се удираат во скачениот простор на авионската кабина, при што на еден од нив му била целосно искината маицата. Додека околу нив се слушале вресоци и повици за помош, останатите патници се обидувале да се повлечат за да избегнат повреди.
Реакција на екипажот и официјална потврда
Ситуацијата брзо излегла од контрола, па членовите на кабинскиот екипаж, со помош на неколку храбри патници, морале физички да интервенираат и со мака да ги раздвојат мажите.
Генералниот директор за односи со јавноста на авиокомпанијата, Мохиудин Ахмед, го потврди инцидентот за медиумите, појаснувајќи дека станува збор за летот BG201 кој сообраќал на рутата Силхет–Лондон.
Иако на интернет се појавуваат разни шпекулации за причините кои довеле до тензиите, компанијата сè уште нема официјално соопштено што ја запалил искрата меѓу патниците. Исто така, останува непознато дали по слетувањето на аеродромот во Лондон патниците биле пречекани од полиција и какви санкции или забрани за идни летови ќе им изрече авиокомпанијата. Овој инцидент уште еднаш ја отвора загриженоста за безбедноста и однесувањето на патниците за време на долгите летови.
© Vecer.mk, правата за текстот се на редакцијата
