Победата на радикално десничарската партија АфД во германската покраина Саксонија-Анхалт шокираше значаен дел од Европа, а доколку партијата успее да формира влада, таа ќе биде под посебно внимание на Европската Унија, која годишно издвојува околу 500 милиони долари за оваа покраина.
Од буџетот на ЕУ за периодот од 2021 до 2027 година, Саксонија-Анхалт добива вкупно 2,95 милијарди евра. Овие средства се користат за проекти како што се реновирање на училишта, целосна реконструкција на спортски сали и градинки, како и за набавка на модерна медицинска опрема за болниците, објавува Кликс.
Според статистичките податоци, Саксонија-Анхалт е германската покраина која добива најмногу средства од ЕУ за регионален развој по глава на жител.
Меѓутоа, доколку АфД формира влада во оваа покраина и спроведе одредени ветувања што се спротивни на правилата на ЕУ, може да има замрзнување на средствата. Тоа може да биде голем проблем за покраината каде што средствата од ЕУ сочинуваат 20 проценти од буџетот.
Како што изјави за „Тагешау“ Даниел Фројнд, член на Европскиот парламент, АфД е партија која дејствува против европскиот проект и Европската Унија. Тој верува дека Европската комисија, доколку е потребно, ќе мора да ги задржи средствата.
Фројнд беше еден од европратениците кои најмногу се спротивставија на поранешниот унгарски премиер Виктор Орбан и успеа да го натера Брисел да одбие до 18 милијарди евра помош. Средствата наменети за Полска беа исто така привремено замрзнати во периодот кога на власт беше десничарската партија ПиС.
„Во обете земји видовме дека по замрзнувањето на средствата од ЕУ дојде до промена на владата и дека новите влади имаа многу подобар однос со европските институции“, вели Фројнд.
Тој наведува дека ова особено се однесува на Унгарија, каде што, според него, може да се видат силни реформи, враќање на владеењето на правото и почитување на правилата на ЕУ.
Фројнд сега верува дека истото може да се случи и во Саксонија-Анхалт ако покраинската влада не ги почитува основните права и вредности на ЕУ. Како пример, тој го спомена доведувањето во прашање на владеењето на правото или дискриминацијата врз малцинствата.
ЕУ има право да ги суспендира исплатите ако средствата би можеле да придонесат за корупција или кршење на владеењето на правото. Во Германија, ова важи и за нивото на федералните покраини, односно за таканаречените структурни фондови, кои најчесто ги управуваат самите покраини.
Друга германска партија, СПД, има намера да се залага за време на преговорите за следниот буџет на ЕУ за периодот од 2028 до 2034 година, Саксонија-Анхалт да продолжи да користи европски средства.
Сепак, овие средства се поврзани со основните вредности на ЕУ, вели пратеникот во Европскиот парламент Матијас Еке.
„Претпоставувам дека Саксонија-Анхалт ќе продолжи да ги почитува тие вредности или дека федералната влада ќе се погрижи тие да се почитуваат“, рече Еке.
АфД, сепак, вели дека овие најави нема да го променат ставот на партијата.
„Се смееме на нашите политички противници кои сега се обидуваат да нè стават во неповолна положба дури и на ниво на ЕУ на недемократски начин. Тие долго време се немоќни против нас во политичката конкуренција“, рече шефот на пратеничката група на АфД, Бернд Бауман.
© Vecer.mk, правата за текстот се на редакцијата
