Администрацијата на американскиот претседател Доналд Трамп планира да издвои дополнителни 242 милиони долари за борба против епидемијата на ебола во Африка, соопшти американскиот Стејт департмент. Овие средства сè уште треба да бидат одобрени од Конгресот, а ќе бидат наменети за итно сузбивање на епидемијата, зајакнување на подготвеноста на земјите во регионот и хуманитарна помош.
Оваа најава доаѓа откако администрацијата на Трамп, по преземањето на власта во јануари 2025 година, го намали обемот на меѓународните програми за помош, преиспита низа иницијативи во странство и ги повлече САД од Светската здравствена организација (СЗО).
Според соопштението на американското министерство, новите средства се надоврзуваат на обврските преземени на самитот на Г7 во јуни. Со ова, вкупната директна американска помош за борба против епидемијата на ебола ќе надмине 512 милиони долари.
Најголемата епидемија во историјата на земјата
Американската администрација најави и дополнителни 350 милиони долари хуманитарна помош за Демократска Република Конго, Јужен Судан и Уганда. Овие пари се дел од претходно најавениот пакет од 1,8 милијарди долари за Канцеларијата на ОН за координација на хуманитарни прашања (ОЦХА), наменет за поголем број земји.
Еболата е исклучително заразна вирусна болест која се пренесува со директен контакт со заразени лица или нивни телесни течности, а многу често завршува со смртен исход.
Хуманитарната организација „Лекари без граници“ (MSF) предупреди дека епидемијата во источниот дел на Демократска Република Конго, која трае речиси два и пол месеци, ги достигна досега најголемите размери. Се работи за најголемата епидемија на ебола во историјата на оваа земја. Според нивните податоци, досега се лабораториски потврдени повеќе од 3.600 случаи на зараза, а околу 1.500 луѓе веќе го загубија животот.
© Vecer.mk, правата за текстот се на редакцијата
