Турскиот претседател Реџеп Таип Ердоган, пакистанскиот премиер Шехбаз Шариф и командантот на пакистанската армија Асим Мунир ќе се состанат со саудискиот престолонаследник Мохамед бин Салман за официјално да потпишат нов заеднички споразум, пренесува „Ројтерс“.
Висок турски официјален претставник потврди дека договорот ќе биде потпишан, но засега не се објавуваат детали за конкретните воени и одбранбени обврски што ќе ги преземат трите земји.
Овој договор е резултат на речиси едногодишни интензивни преговори помеѓу трите регионални сили. Турскиот министер за надворешни работи, Хакан Фидан, претходно изјави дека Анкара се залага за поширока регионална безбедносна платформа која би ја поттикнала соработката и стабилноста.
Сојузот носи голема геополитичка тежина со оглед на тоа што Турција е клучна членка на НАТО, Саудиска Арабија е еден од најголемите светски извозници на нафта и највлијателна држава во Персискиот Залив, додека Пакистан е единствената муслиманска земја што поседува нуклеарно оружје.
Според претходните информации, постоечкиот билатерален договор меѓу Саудиска Арабија и Пакистан веќе предвидува дека секој напад врз едната земја ќе се сфати како напад врз двете, вклучувајќи употреба на „сите расположливи воени средства“. Новиот трилатерален рамковен договор дополнително го проширува ова безбедносно партнерство.
Пакистанската армија и владата на Саудиска Арабија засега не одговорија на барањата за коментар.
© Vecer.mk, правата за текстот се на редакцијата
