Британскиот премиер Енди Бернам изјави дека Велика Британија треба да разгледа различни опции за своите идни односи со Европската унија, вклучително и можно враќање во ЕУ. Бернам зборуваше за Би-би-си откако на годишната конференција на Лабуристичката партија истакна дека Брегзит „направил повеќе штета отколку корист“.
Тој рече дека Британија треба да разгледа различни модели на долгорочни односи со Европа и да одлучи кој најмногу би ѝ одговарал. „Можеме да останеме таму каде што сме. Тоа секако е една опција, доколку луѓето сметаат дека ова е добра позиција. Можеме да размислиме за она што го кажа Џорџ Озборн во врска со царинската унија. Можеме да разгледаме што кажаа Либералните демократи на нивната конференција за единствениот пазар, а можеме и да одиме до крај“, рече Бернам.
Поранешниот конзервативен министер за финансии Џорџ Озборн се залагаше за влез на Британија во царинска унија со ЕУ, додека Либералните демократи повикаа на враќање на земјата на европскиот единствен пазар. Бернам изјави дека сите опции треба да се проценат врз основа на тоа „што е изводливо“, како и врз основа на предностите и недостатоците на секоја од нив.
Последиците од Брегзит и најавата за самитот
Во 2016 година, Велика Британија на референдум одлучи да ја напушти Европската унија, ставајќи крај на повеќедецениското членство. По ова следеше повеќегодишен период на политички превирања, при што британските влади мораа да се справуваат со економските и дипломатските последици од Брегзит.
Бернам претходно изјави дека ќе претстави опции за долгорочните односи на Британија со ЕУ на британско-европскиот самит во ноември. Бернам претходно има изјавено дека би сакал Британија повторно да се приклучи кон Европската унија во текот на неговиот живот. Тој исто така нагласи дека земјата не може да си дозволи уште една деценија неизвесност околу ова прашање.
© Vecer.mk, правата за текстот се на редакцијата
