Веб-страницата за исчезнати лица известува дека сè уште „нема никаков контакт“ со дури 43.251 пријавено лице. Оваа бројка е во благ пад во споредба со претходниот ден кога бројот на исчезнати изнесуваше околу 46.000, пренесува „Скај Њуз“ (Sky News).
Според официјалните податоци објавени од властите, претседателот на Народното собрание, Хорхе Родригез, соопшти дека во катастрофалните земјотреси досега е потврдена смртта на 1.719 лица, додека 5.034 се повредени, а дури 15.866 граѓани останаа целосно без своите домови.
Обединетите нации (ОН) претходно упатија застрашувачко предупредување дека конечниот број на жртви би можел да порасне и до 10.000, додека сложените операции за пребарување и спасување продолжуваат под урнатините ширум погодените подрачја.
Два разорни удари во рок од само 39 секунди
Венецуела беше погодена од два исклучително силни, последователни земјотреси со јачина од 7,2 и 7,5 степени според Рихтеровата скала. Она што ја направи катастрофата уште поголема е фактот дека тие се случија во кус размак од само 39 секунди, при што најтешко настрада крајбрежната сојузна држава Ла Гваира.
По овие два разорни земјотреси, тлото во Венецуела не мирува – регистрирани се уште стотина накнадни потреси со послаб интензитет кои дополнително ја отежнуваат работата на спасувачките тимови и внесуваат паника кај населението.
© Vecer.mk, правата за текстот се на редакцијата
