На повеќето држави во Евроспката унија им се потребни работници кои тие ги немаат поради намален природен прираст на населението и широко отвараа врати за мигранти кои ќе ги пополнат празните работни места. Но, нивниот план излезе од контрола бидејќи со војните во Азија и северна Африка се случи и непланиран огромен број на бегалци кои спас бараа во богатите европски држави, со што се поремети планот за контролирна миграција.
Практично, богатите држави од ЕУ, кои подржуваа војни и “револуции“ во Либија, Ирак, Сирија... сега се соочуваат со практичните последици од таа политика. Прилив на некотролирни, големи бранови бегалци и мигранти.
Сега Шведска води анти мигрантска политика. Да ги протера бегалците и мигрантите не е лесно, следат опасни инциденти и отпор, па затоа им нуди пари да се вратат во државите од кои, како бегалци, дошле. А парите не се малку.
На почетокот на оваа година, Шведска ја зголеми финансиската помош за луѓето кои сакаат доброволно да се вратат во својата татковина. За возрасен се обезбедуваат до 350.000 шведски круни, или околу 32.000 евра, додека за целото домаќинство може да се добијат до 600.000 круни.
Мерката стапи на сила на 1 јануари 2026 година, а веќе во првите неколку недели предизвика голем интерес. Според податоците од Шведската агенција за миграција, до средината на февруари аплицирале 272 апликанти, од кои 82 апликации веќе биле одбиени.
Неколку недели подоцна, бројот на барања се зголеми на околу 370, а шведските власти ги одобрија првите барања за нова, многу повеликодушна помош.
Кој може да ги добие парите?
Иако оваа мерка често се опишува како плаќање на мигрантите за да ја напуштат Шведска, таа не е достапна за сите странци кои живеат во земјата.
Лицата кои имаат важечка дозвола за престој во Шведска добиена врз основа на заштита - на пример бегалци или лица на кои им е доделена супсидијарна заштита - можат да аплицираат за помош, заедно со други услови. Како по правило, тие мора да имаат дозвола за престој издадена на или пред 12 септември 2024 година.
Пари може да се добијат за преселба во матичната земја или друга земја каде што лицето има право да живее, но не и за преселба во друга земја од ЕУ, ЕЕА или Швајцарија.
Колку се добива?
Новите правила донесоа огромно зголемување на стимулациите.
Возрасен може да добие до 350.000 круни, или околу 32.000 евра. Брачен или невенчан пар може да добие максимум 500.000 круни, додека максималната помош за целото домаќинство е 600.000 круни, или околу 55.000 евра.
Дополнителни 25.000 круни, или околу 2.300 евра, се обезбедуваат за секое дете.
Пред зголемувањето, помошта беше многу пати помала - возрасен можеше да добие само 10.000 круни. Шведска со тоа го зголеми износот дури 35 пати.
Шведска сака да го поттикне доброволното враќање
Владата ја оправдува оваа мерка со желбата да им обезбеди на луѓето кои не успеале да се интегрираат во шведското општество нов почеток во нивната земја на потекло. Во исто време, тие веруваат дека враќањето на дел од населението би можело да придонесе за развој на економијата и пазарот на трудот во нивните матични земји.
Програмата за доброволно враќање во Шведска постои од 1984 година, но претходно многу малку луѓе ја користеа финансиската помош. Токму затоа владата одлучи драстично да го зголеми износот и да го направи доволно голем за да им даде на луѓето вистински финансиски поттик да заминат.
Мерката, сепак, предизвика контроверзии. Шведската агенција за миграција веќе објави во март дека ги одобрила првите барања, додека критичарите предупредија на можни проблеми со таквата политика, како и на фактот дека зголемувањето на помошта беше воведено и покрај резервите од претходната државна истрага.
© Vecer.mk, правата за текстот се на редакцијата
