Шпионскиот софтвер LightSpy прерасна во глобална комерцијална платформа за надзор која директно ја загрозува инфраструктурата во повеќе од десет земји, вклучувајќи и членки на НАТО алијансата.
Истражувачите за безбедност наведуваат дека имаат докази дека шпионскиот софтвер поврзан со Кина се проширил од континентална Кина и дека сега таргетира жртви во повеќе од десетина земји, вклучително и ширум Европа и Соединетите Американски Држави.
Претходно идентификуваниот шпионски софтвер има и нови функционалности кои можат да украдат огромни количини податоци и од далечина да онеспособат уреди.
Истражувачите од компанијата за сајбер-безбедност Arctic Wolf изјавија дека шпионскиот софтвер LightSpy, првпат откриен во 2018 година и претходно поврзан со хакери поддржани од кинеската држава, во меѓувреме се развил во комерцијална шпионска платформа управувана од еден актер на закана, која нуди услуги на влади, претпријатија и армии.
Платформата наводно содржи прилагодено брендирање, систем за наплата и демо-презентации за рекламирање пред потенцијалните клиенти.
Овие сознанија нагласуваат како употребата на шпионски софтвер продолжува да се шири надвор од рамките на владите и хакерите поддржани од државите, и сè пошироко завлегува во приватната индустрија.
LightSpy е модуларна шпионска платформа која му овозможува на оној што управува со неа да нападне голем број различни уреди, вклучувајќи паметни телефони, Apple уреди, Linux сервери и Windows компјутери. Со користење на безбедносни пропусти за секој уред, овој шпионски софтвер може да украде големи количини чувствителни информации од своите мети, вклучувајќи прецизни податоци за локацијата, преписки од апликации за разговор, снимки од екранот и зачувани лозинки. Истражувачите исто така наведоа дека кодот е способен од далечина да ги избрише и уништи податоците на компромитираниот уред.
Истражувачите изјавија дека LightSpy сега е идентификуван и кај рутерите, што, како што наведуваат, претходно не го гледале. Со напад врз рутерите, хакерите можат да добијат увид и пристап до кој било друг уред на истата мрежа.
Некои од компромитираните рутери се поврзани со земји членки на НАТО, соопшти Arctic Wolf.
Според наводите на компанијата, LightSpy управува со мрежа од најмалку 117 сервери во неколку земји ширум светот.
Истражувачите изјавија дека успеале да ги поврзат најновите активности со кинески подизведувач откако еден од операторите на шпионскиот софтвер го искористил администраторскиот панел на LightSpy за да нарача храна од ресторанот Kentucky Fried Chicken користејќи го своето вистинско име и адресата на канцеларијата.
© Vecer.mk, правата за текстот се на редакцијата
