Баерн Минхен со победа од 4:1 на гостувањето кај Оснабрик го започна настапот во Купот на Германија. Домаќинот приреди изненадување уште во петтата минута, кога Робин Мајснер со спектакуларен удар од голема далечина го совлада Јонас Урбиг.
Сепак, радоста на второлигашот траеше кратко, бидејќи Хари Кејн во 18. минута израмни на 1:1. Баерн продолжи да ја контролира играта, а пресвртот го комплетираше Том Бишоф во 24. минута.
Во второто полувреме баварците продолжија со доминацијата и создаваа шанси пред голот на домаќинот. Мајкл Олисе во 73. минута зголеми на 3:1 и практично го реши победникот. Конечниот резултат го постави Кејн во 86. минута од пенал, откако Александар Павловиќ беше фаулиран во шеснаесетникот.
