Премиерот Христијан Мицкоски, во рамки на престојот во Њујорк, учествуваше на панел-дискусијата на високо ниво „Reaffirming the promise of peace: using the power we have“, чиј домаќин беше претседателот на Република Финска, Александар Стуб.
На панелот се разговарало за значењето на мирот, дијалогот и одговорното лидерство, како и за улогата на државите и меѓународните институции во справувањето со глобалните предизвици.
Мицкоски информираше и за средбата со финскиот претседател Стуб, на која, како што наведува, биле истакнати важноста на почитувањето на меѓународното право, силната мултилатерална соработка и потребата од градење стабилна и безбедна Европа.
„Македонија останува посветен партнер во напорите за мир, стабилност и соработка, како членка на НАТО и земја стратешки определена кон европската интеграција“, порача Мицкоски.
Средбата и учеството на панелот, како што посочува премиерот, претставуваат можност Македонија да го потврди своето партнерство во рамки на меѓународната заедница и определбата за придонес кон мирот, стабилноста и соработката.
© Vecer.mk, правата за текстот се на редакцијата
