Mладите брачни парови до 40 години и самохраните родители што сакаат да изградат свој дом ќе бидат ослободени од делот од надоместокот за уредување на градежното земјиште што му припаѓа на Град Скопје, односно 60% од вкупните комуналии, за објекти во рамките на Генералниот урбанистички план на градот, објави градоначалникот на Скопје, Орце Ѓорѓиевски.
Мерката ќе стапи во сила веднаш по објавувањето во службените гласила, а барањето за аплицирање ќе биде достапно на веб-страницата на Град Скопје.
– Доколку сите скопски општини се приклучат со ослободување и од својот дел, оваа поддршка ќе достигне 100% ослободување од комуналии. Ги повикувам сите мои колеги градоначалници да застанеме заедно зад оваа цел и да им го олесниме патот до сопствен дом на што повеќе семејства. Имаме можност да оставиме нешто вредно зад себе – повеќе семејства со сопствен покрив над главата и со поголема сигурност за утрешниот ден – рече Ѓорѓиевски.
Според него, ова е директна инвестиција во младите, во сигурноста на семејствата и во иднината на Скопје.
Помал финансиски товар при изградбата значи повеќе средства за уредување на домот, за потребите на децата и за посигурен почеток на заедничкиот живот.
– Успешната практика што ја воспоставивме во Кисела Вода, првпат во историјата на државата, сега ја пренесуваме и во Град Скопје – додаде градоначалникот Ѓорѓиевски.
© Vecer.mk, правата за текстот се на редакцијата
