Добри вести за клиентите на „АЛТА банка“ АД Битола. Од денеска, покрај во Битола, отворени се и шалтерите во Тетово и Струмица, со што на граѓаните им се овозможува полесен и побрз пристап до нивните средства. Истовремено, зголемен е и неделниот лимит за користење на платежните картички.
Граѓаните кои немаат платежни картички можат директно на шалтерите во трите града да подигнат до 20.000 денари. Шалтерите во Битола работат од 6 ноември, а со отворањето на експозитурите во Тетово и Струмица дополнително се олеснува пристапот до банкарските услуги.
Според информациите од Народната банка, исплатата на средствата се одвива непречено и согласно утврдениот распоред. Во експозитурата во Струмица утрово било забележано краткотрајно доцнење поради логистичка организација, но исплатата набрзо продолжила според предвидената динамика.
Дополнително олеснување за клиентите е зголемувањето на неделниот лимит за подигање готовина и плаќање со платежни картички, од досегашните 10.000 на 15.000 денари. Новиот лимит започнува да се применува од оваа недела.
Исплатите на шалтерите ќе продолжат и во наредните денови, со цел сите клиенти да добијат можност да располагаат со своите средства.
Од Народната банка информираат дека внимателно ја следат состојбата и континуирано преземаат мерки за обезбедување непречено опслужување на граѓаните.
Приоритет останува заштитата на интересите на клиентите и обезбедувањето стабилен и организиран пристап до нивните пари.
© Vecer.mk, правата за текстот се на редакцијата
