Генералниот секретар на ОН, Антонио Гутереш, денес ги повика светските лидери кои присуствуваат на конференцијата за климата COP31 во Турција да преземат порешителни мерки против климатските промени. Тој предупреди дека ефектите од глобалното затоплување дополнително се влошуваат од исклучително силниот феномен Ел Нињо.
„Влеговме во нова ера на климатски екстреми. Исклучително силниот Ел Нињо се судира со веќе прегреана планета поради климатските промени предизвикани од човекот“, рече Гутереш во изјава пред отворањето на конференцијата на ОН за климата во Анталија.
„Лидерите мора да одговорат на предизвиците: со побрзо намалување на емисиите, забрзување на праведната транзиција и напуштање на фосилните горива и обезбедување финансиска помош и заштита на ранливите земји“, додаде тој. Се очекува претставници на околу 200 земји да присуствуваат на двонеделната конференција.
Конференцијата доаѓа само неколку дена откако климатските научници предупредија дека 2026 година речиси сигурно ќе биде годината во која глобалното затоплување ќе ја надмине границата од 1,5 степени Целзиусови во споредба со прединдустриското време.
© Vecer.mk, правата за текстот се на редакцијата
