Разорното невреме што ги погоди Соединетите Американски Држави и предизвика сериозни поплави во делови од Њу Џерси, покрај материјална штета, донесе и една шокантна и мошне несекојдневна глетка – ајкула е снимена како плива по потопените градски улици!
Инцидентот е забележан во сабота, 26 септември 2026 година, на Лонг Бич Ајленд. Видеото што брзо се рашири на социјалните мрежи прикажува ајкула како мирно минува покрај ограда, плива право кон приодот на една семејна куќа во станбената населба Сурф Сити, а потоа продолжува кон заливот Барнегат Беј.
Иако медиумите првично беа претпазливи, познатиот истражувач на ајкули од Одделението за морски риболов на Масачусетс, Грег Скомал, потврди дека најверојатно станува збор за вид кој е вообичаен во овие крајбрежни води и не претставува директна опасност за луѓето.
Како ајкулата заврши на асфалтот?
Сурф Сити е сместен на тесен бариерен остров помеѓу Атлантскиот Океан и заливот. Под налетот на невремето кое донесе ужасни удари на ветерот со брзина од околу 119 километри на час, разбрануваната морска вода ја преплави бариерната зона и длабоко навлезе во урбаните, ниски населби. Со тоа, природното живеалиште на ајкулата практично се „слеа“ со улиците.
Невремето создаде хаос долж целото крајбрежје на Њу Џерси – улиците и дворовите беа целосно под вода, а жителите во дел од населбите беа принудени да користат кајаци и чамци за да се движат низ своите маала.
Вистинската опасност демнеше под водата
Иако средбата со ајкула во сопствениот двор звучи како сцена од хорор филм, локалните власти потсетуваат дека морскиот грабливец воопшто не бил вистинската опасност.
Многу поголем ризик претставувале самите поплавни води, силните струи и скриените опасности под површината. Надлежните упатија строг апел до граѓаните воопшто да не се обидуваат да возат низ поплавените улици, бидејќи зад навидум безопасната вода често се кријат огромни дупки, оштетен асфалт и опасни отворени шахти.
© Vecer.mk, правата за текстот се на редакцијата
