Добриот ручек не вклучува секогаш месо, а чорбата што ја предлагаме денес е најдобар пример за тоа. Вкусна комбинација од наут, боранија и друг зеленчук и зачини не само што ќе го задоволи вашиот стомак, туку и ќе му обезбеди на вашето тело доволно количество масти и протеини.
Боранијата е полна и со други важни хранливи материи, особено со минерали како што се магнезиум, калиум и калциум. Освен тоа, оваа чорба може да биде и одличен предлог за хранлив и исполнет ручек, доколку постите. Во продолжение погледнете го рецептот:
Чорба од наут и боранија
Состојки:
• 220 грама варен наут (една мала конзерва)
• 200 грама свежа боранија
• 200 мл доматно пире
• 2 компири
• 2 моркови
• 1 кромид
• 2-3 чешниња лук
• 1 лажица доматен концентрат
• 1 литар супа од зеленчук
• растително масло
• сол и бибер по вкус
Подготовка:
• На малку растително масло пропржете го ситно исечканиот кромид.
• Додадете ситно сечкан лук во тавата и пропржете сè заедно уште околу една минута.
• Додадете ги морковите исечкани на коцки.
• Додадете доматен концентрат и доматно пире и сè добро измешајте.
• Во тенџере ставете компири исечени на мали коцки. Сè добро измешајте и додадете вода или супа од зеленчук. Ако не ја правите супата од зеленчук сами, можете да користите и супа купена во продавница.
• Зачинете со сол и бибер. Додадете билки по ваш избор, како власец, магдонос или босилек.
• Во тенџерето додајте го претходно сварениот наут (или наутот од конзерва што сте го исцедиле и исплакнале под млаз вода) и исчистената боранија исечена на помали парчиња.
• Гответе сè заедно околу 20 до 30 минути или додека зеленчукот не омекне. Колку се помали парчињата морков и компири, толку помалку време ќе ви треба за готвење.
• Чорбата послужете ја со парче леб и салата по ваш избор, а во садот можете да додадете и малку семки од тиква. Уживајте!
Совет плус:
За чорбата можете да користите и замрзната боранија, но во тој случај додадете ја околу пет до десет минути пред крајот на готвењето за да не се превари.
© Vecer.mk, правата за текстот се на редакцијата
