Полска беше издвоена како економско чудо на Европа и со неверојатен пораст на стандардот од 316% за 30 години е на пат да ја стаса Јапонија. Но, според најновите податоци на Евростат, Полска сега е меѓу членките на ЕУ на кои најбрзо им расте долгот. Тоа само по себе не е причина за тревога, но ќе ѝ направи проблеми на Варшава во наредните години за да го задржи растот.
Полска меѓу европските лидери по раст на долгот
Варшава објави дека државниот долг на земјата до крајот на мај надминал 492 милијарди евра, што претставува зголемување од речиси 42,5 милијарди евра од почетокот на годината. Според проценки, во јуни долгот се зголемил за уште 53,7 милијарди злоти, со што вкупниот износ достигнал речиси 505 милијарди евра.
Рекордни потреби за задолжување
На ниво на ЕУ, само Финска и Бугарија забележале поголем пораст на односот меѓу јавниот долг и БДП во првиот квартал од оваа година. Задолжувањето на Полска пораснало за 4,5% во споредба со истиот период лани.
Сепак, вкупното ниво на долг останува значително под просекот на ЕУ. На крајот на првиот квартал, долгот бил 61,6% од БДП, наспроти просекот во ЕУ од 83%. За споредба, грчкиот долг надминува 143,5% од БДП, италијанскиот e 139%, а францускиот долг е 117,6%.
Но, според полскиот Устав, Владата е обврзана да спроведе значителни кратења во расходите откако долгот ќе ја надмине границата од 60% од БДП.
Кој ѝ позајмува пари на Полска?
Структурата на долгот покажува дека Полска за финансирање првенствено се потпира на домашниот пазар. На крајот од мај, приближно 80% од долгот на Државната каса се наоѓаше кај домашни субјекти, додека нешто помалку од 20% се надворешни обврски. Домашните банки и небанкарскиот сектор остануваат најголеми доверители, иако странските инвеститори поседуваат речиси 29% од долгот.
Дали има причина за загриженост?
Зголемувањето на долгот само по себе не значи автоматски влошување на состојбата на јавните финансии. Клучни фактори се темпото на економски раст, висината на дефицитот и трошоците за сервисирање на долгот.
Економистите предупредуваат дека ако се задржи високиот дефицит, а економскиот раст слабее, просторот за натамошно зголемување на јавната потрошувачка постепено ќе се намалува.
Извор. Еуроњус
© Vecer.mk, правата за текстот се на редакцијата
