118 објекти се целосно уништени и не можат да бидат поправени по големите шумски пожари што ги зафатија делови од Грција, покажале првичните инспекции на властите.
Инспекторите на Министерството за инфраструктура досега извршиле проверки на 325 објекти во најпогодените региони, меѓу кои западна Атика, Крит, Виотија, Ахаја, Арголида на Пелопонез и Фокида во централна Грција.
Најголема штета е регистрирана во западна Атика, каде што 84 објекти се целосно изгорени, додека 67 претрпеле оштетувања кои можат да бидат санирани. Властите продолжуваат со проценките на терен за да се утврди целосниот размер на материјалната штета по пожарите, објави „Екатимерини“.
Од нив, 118 објекти – најголем дел во западна Атика – се прогласени за небезбедни и ќе мора да бидат урнати. За 119 е утврдено дека се оштетени, но можат да се поправат, додека 88 објекти се оценети како погодни за живеење.
Во областа Ретимно на Крит, каде што минатата недела загинаа двајца пожарникари додека се бореа со огнената стихија, биле проверени 55 објекти. Од нив, 19 се прогласени за целосно уништени, а 12 можат да бидат обновени.
Уште седум објекти се прогласени за небезбедни во Виотија, каде што минатиот петок избувна пожарот кој подоцна се прошири кон западна Атика, шест во Фокида и два во Арголида.
© Vecer.mk, правата за текстот се на редакцијата
