Иконата на францускиот филм, Брижит Бардо, почина на 92-годишна возраст, јавуваат француските медиуми.
Актерката Брижит Бардо беше една од најубавите жени на 20 век. Таа остави зад себе култни достигнувања и улоги што ѝ донесоа слава.
Ја напушти својата филмска кариера пред речиси педесет години и оттогаш целата своја енергија ја посвети на заштита на животните, пишува Фигаро.
Родена е на 28 септември 1934 година во 15-от париски арондисман, каде што имала строго воспитување. Нејзината мајка, која сонувала да стане балерина, ја пренела нејзината љубов кон класичниот балет и ја запишала на Парискиот конзерваториум.
Нејзиниот татко, љубител на филмови, и ја пренел фасцинацијата со големото платно, на кое подоцна ќе се појави.
Почетоци на екранот
Познавањата на нејзините родители од висока општествена класа ѝ овозможиле да ги направи првите чекори во светот на модната фотографија. На петнаесетгодишна возраст, таа била на насловната страница на познатото списание „Ел“.
Младата Брижит брзо беше забележана по својот бунтовен шарм и невиниот израз, што ѝ ги отвори вратите на филмската индустрија.
Во 1952 година, на седумнаесетгодишна возраст, таа ја доби својата прва улога, Жавот во „Le trou Normand“. Преку овој филм ја запозна својата прва љубов, Роже Вадим, еден од помошниците-режисери.
Кратко откако наполни осумнаесет години, тие се венчаа, по бројни преговори со нејзините родители за да го прифатат бракот.
Приватен живот
Бардо имаше неколку бракови. Нејзината личност надвор од филмското платно привлече огромно медиумско внимание.
Во автобиографии и интервјуа, Бардо отворено зборуваше за своите лични борби, вклучително и за менталното здравје.
Филмска кариера
Во 1956 година, Брижит стана ѕвезда благодарение на нејзината улога во филмот „И Бог ја создаде жената“ (Et dieu créa la femme). Филмот беше веднаш успешен и стана хит и во Америка.
Нејзиниот слободоумен и заводлив изглед ја направи симбол на сексуалната револуција од тоа време. Во текот на 1950-тите и 1960-тите, таа се појави во бројни филмови, вклучувајќи ги „La Verite“ (1960), „Le Mepris“ (1963) и „Viva Maria!“ (1965).
За време на нејзината кариера, Бардо глумеше во повеќе од 40 филмови и остави силен белег во европското и светското кино.
Покрај филмот, Бардо имаше и музичка кариера, снимајќи над 60 песни и неколку албуми во текот на 1960-тите.
Подоцнежен живот и активизам
По пензионирањето од филмската кариера во 1973 година, Бардо се посвети на борбата за правата на животните. Таа ја основа Фондацијата Брижит Бардо во 1986 година, која се занимава со заштита на животните и животната средина.
Наследството на икона на француското кино
Брижит Бардо е икона на француското и светското кино, симбол на гламур и слободен дух и инспирација за бројни уметници и активисти низ целиот свет.
Без разлика дали беше прикажана како девојка или како фатална жена, Брижит Бардо ги помести моралните граници со своите улоги во време кога голотијата и сензуалноста често беа цензурирани, пишува radiofrance.
© Vecer.mk, правата за текстот се на редакцијата
