Речиси 5.000 евра наместо вообичаена сметка за седум оброци – толку пари наводно му биле повлечени од картичката на 71-годишен слеп гостин во ресторан во Виена. Мажот во текот на две недели во мај седумпати го посетил ресторанот „Балкан грил“ во округот Бригитенау, но поради оштетениот вид не можел да го провери износот што му бил внесуван во терминалот и му верувал на персоналот. По повеќемесечна истрага, сопственикот на ресторанот Мирсад А. е уапсен, а против него има сомнежи за измама, разбојништво и подметнување пожар.
Според австриските медиуми, износите постепено се зголемувале, а за еден оброк од картичката наводно му биле наплатени дури 2.000 евра. Вкупно биле повлечени 4.933,33 евра.
Случајот бил откриен неколку недели подоцна, кога 71 годишникот со помош на својот асистент ги проверил банкарските изводи. Кога видел колку пари недостигаат, му се слошило и бил пренесен во болница. Парите, според неговото сведоштво, ги штедел за трошоците за сопствениот погреб.
Семејството на оштетениот побарало објаснување од ресторанот. Оттаму првично тврделе дека станува збор за техничка грешка, а потоа дека погрешните износи биле внесени поради малите копчиња на терминалот. По пријавувањето на случајот бил вратен само дел од парите.
Мирсад А. бил уапсен откако се појавил во близина на остатоците од неговиот поранешен ресторан во Флоридсдорф, кој претходно изгорел во пожар. Жена која го препознала ги известила надлежните служби, а обвинителството веќе имало одобрено негово приведување.
Австриските медиуми го поврзуваат осомничениот и со други случаи на тешка измама, разбојништво и подметнување пожар. Овие обвинувања се предмет на истрага и не се докажани со правосилна судска пресуда.
© Vecer.mk, правата за текстот се на редакцијата
