И покрај тоа што Русија ги интензивира нападите врз објекти во Украина поврзани со американски корпорации, американскиот претседател Доналд Трамп и неговата администрација не реагираат на тоа на никаков начин, објавува CNN.
Според Енди Хандер, претседател на Американската стопанска комора во Украина, руските ракети и беспилотни летала ги оштетиле објектите на некои од најпознатите американски брендови, вклучувајќи ги Кока-Кола, ПепсиКо, Мекдоналдс и Орео.
Иако Русија се обиде да го наруши успешниот американски бизнис во минатото, „ништо од тоа не се споредува со она што го видовме во последните месеци“, изјави Хандер за CNN.
„Ова се директни напади со беспилотни летала и ракети, а нападите продолжуваат. Ова испраќа порака дека тие се насочени кон американски компании и некои од најпознатите американски брендови. Не гледаме никаква реакција од Белата куќа“, рече тој.
„Мора да престане затоа што американските интереси, американските пари и американските инвеститори се цел“, рече тој.
Кога руски дрон ја погоди фабриката на Кока-Кола во близина на Киев на почетокот на септември, украинскиот претседател Володимир Зеленски рече дека нападот е „јасен сигнал“ до САД.
„Денес, Русите ја погодија фабриката на Кока-Кола со беспилотно летало. Кока-Кола им стана таков непријател што ја горат со своите шехиди“, рече Зеленски во своето вечерно видео обраќање на 3 септември, осврнувајќи се на „беспилотни летала од иранско производство“.
Руски дрон погоди магацин во сопственост на Мекдоналдс недолго потоа. На крајот на август, ПепсиКо потврди во соопштение за медиумите дека производствениот погон во Николаевската област е оштетен, но нема жртви.
Имотот на компаниите Каргил, Кока-Кола, Боинг, Монделез, Филип Морис, Флекс и Бунге беше цел на напади. Од почетокот на 2026 година, нападите само се интензивираа, а во период од четири недели беа погодени и фабриките на компаниите Бунге, Филип Морис и Монделез.
Си-Ен-Ен објави дека неколку демократски претставници во Конгресот на САД јавно ја повикаа Белата куќа да направи повеќе за да ги заштити американските компании во Украина и да ги осуди постапките на Москва.
© Vecer.mk, правата за текстот се на редакцијата
