Кенија го потврди првиот случај на ебола кај државјанин кој во саботата пристигнал од Демократска Република Конго. Пациентот во меѓувреме починал, соопшти министерот за здравство Аден Дуале. На прес-конференција, Дуале изјави дека досега се идентификувани 28 лица кои биле во контакт со заразеното лице – вклучувајќи членови на семејството и здравствени работници – пренесува Гардијан.
Министерот објасни дека ДР Конго се соочува со најголемата епидемија на ебола во својата историја. Предизвикувач на болеста е реткиот сој на вирусот Бундибуџо. Епидемијата беше официјално прогласена во средината на мај, иако се проценува дека започнала неколку месеци претходно. Напорите за запирање на ширењето досега беа неуспешни. Во оваа централноафриканска земја се регистрирани повеќе од 8.000 случаи на заразени и над 4.000 смртни случаи.
Ширење и симптоми на болеста
Инфекцијата претходно се проширила и во Уганда, каде што биле пријавени 20 случаи и два смртни случаи. Сепак, Светската здравствена организација во август прогласи дека Уганда е земја без ебола. Болеста се шири преку директен контакт со телесните течности на заразените лица, без разлика дали се живи или починати. Симптомите вклучуваат треска, повраќање и дијареја, додека тешките случаи вклучуваат внатрешно и надворешно крварење.
© Vecer.mk, правата за текстот се на редакцијата
