Соединетите Американски Држави ја претставија својата најнова „стелт“ нуклеарна крстосувачка ракета, AGM-181 со долг дострел (LRSO), само неколку дена откако рускиот претседател Владимир Путин се пофали со успешните тестови на руските системи Буревестник и Посејдон.
Прототипот на едно од најтајните оружја во американската програма за нуклеарна модернизација е снимен на бомбардер Б-52 над Калифорнија, пишува Киев Пост.
Фотографијата, направена од авијацискиот фотограф Иан Рекио, го прикажува бомбардерот со „две необични оружја“ под крилата.
Аналитичарите брзо заклучија дека ракетите се совпаѓаат со официјалните рендери на AGM-181, објавени претходно оваа година, и дека сличноста е „премногу голема за да се игнорира“.
Пресметан сигнал на Вашингтон
Летот се случи кратко откако Путин повторно ја промовираше руската нуклеарна крстосувачка ракета Буревестник и подводниот дрон Посејдон, опишувајќи ги како клучни елементи на стратешкиот арсенал на Москва.
Американските аналитичари за одбрана веруваат дека денешниот потег на Вашингтон е пресметан.
„Тоа беше пресметан сигнал“, рече еден аналитичар.
Со својот стелт дизајн и боева глава W80-4 со променлива моќност, LRSO е дизајниран да „се лизга низ радарските мрежи“ и да напаѓа од растојание од повеќе од 2.400 км.
Ракетата, која ја развива компанијата Raytheon, ќе го замени застарениот AGM-86, а се очекува бомбардерите B-52 Stratofortress и новиот B-21 Raider да бидат опремени со неа.
Програмата од 16 милијарди долари треба да влезе во производство со мал обем во 2027 година.
Трката во вооружување
Стратешки, LRSO му дава на Вашингтон флексибилна нуклеарна опција - оружје кое може да се лансира, пренасочи или повлече во средината на летот.
Како што се вели во една проценка, LRSO е „дух во воздухот“, дизајниран да не заплашува со спектакл, туку да обезбеди преживливо и веродостојно одвраќање.
„Времето на ова јавно објавување не може да биде појасно. Додека Русија се фали со својата егзотична ракета Буревестник, а Кина ја забрзува сопствената нуклеарна модернизација, Соединетите Американски Држави покажуваат дека нивната предност во одвраќањето останува недопрена“, се додава во извештајот.
© Vecer.mk, правата за текстот се на редакцијата
