Ко-сопственикот на Манчестер Јунајтед, Сер Џим Ретклиф и неговата компанија INEOS ја ставија швајцарската Лозана на продажба, во рамките на поширокото повлекување од дел од спортските инвестиции.
Според „Атлетик“, за пронаоѓање потенцијални купувачи е ангажирана консултантската компанија „Alvarez & Marsal“, која веќе подготвила продажна презентација под името „Project Striker“.
Во документот се истакнуваат инфраструктурата на клубот и можностите за пласман во европските натпреварувања, но не се споменуваат финансиските загуби и фактот дека Лозана моментално се наоѓа на последното место во швајцарското првенство.
Продажбата доаѓа откако INEOS претходно ја понуди на продажба и француска Ница. Компанијата во последниот период прекина и неколку спонзорски соработки, што укажува на промена на стратегијата и намалување на спортското портфолио.
Ретклиф, кој поседува малцински удел во Манчестер јунајтед и има значајна улога во управувањето со фудбалскиот сектор на клубот, се соочува и со растечки критики поради резултатите на англискиот гигант.
Лозана беше првиот голем фудбалски чекор на INEOS, која го презеде клубот во 2017 година.
