Серија случаи на семејно насилство е регистрирана низ Македонија, при што штипјанка завршила во болница по напад од сопругот, жена од Гостиварско пријавила физички напад и силување од вонбрачниот партнер, а родители во друг случај биле нападнати од својот син. Во полицискиот билтен се евидентирани и други случаи, меѓу кои и пријава од кумановка дека била физички нападната од синот и снаата. Случаите се пријавени во повеќе градови, а полицијата презема мерки за нивно целосно расчистување.
Во Кавадарци, полицијата вчера во 14 часот го привела 40-годишниот Ј.Ф., по пријава дека физички ја нападнал својата 33-годишна сопруга, со која се наоѓал во бракоразводна постапка, и ѝ се заканувал со остар предмет. Тој бил задржан во полициска станица, а за случајот биле известени јавен обвинител и Центарот за социјални работи во Кавадарци.
Во Куманово, пак, 48-годишна жена пријавила дека била физички нападната од нејзиниот 26-годишен син и неговата сопруга.
Нов случај на семејно насилство е пријавен и во Штип, каде што утрово полицијата го привела 23-годишен штипјанец, осомничен дека извршил семејно насилство врз својата 24-годишна сопруга. Жената се здобила со повреди, констатирани во Клиничката болница во Штип.
Во Гостивар, пак, бил приведен 55-годишен маж, откако 40-годишна жена пријавила дека нејзиниот вонбрачен сопруг физички ја нападнал и ја силувал. Уште еден приведен е во Гостиварско, каде што полицијата уапсила 47-годишен маж по пријава на неговата 49-годишна сопруга дека физички ја нападнал со стаклен предмет во семејниот дом.
Во Скопје, 43-годишна жена пријавила дека таа и нејзиниот поранешен сопруг биле физички нападнати од нивниот малолетен син, кој, според пријавата, искршил и дел од покуќнината во семејниот дом во Гази Баба.
Од МВР информираат дека по целосното документирање на случаите ќе следуваат соодветни пријави, а за дел од настаните сè уште се преземаат мерки за нивно расчистување.
© Vecer.mk, правата за текстот се на редакцијата
