Ништо од најавеното заедничко чествување на роденденот на Гоце Делчев во Софија. Под покровителство на бугарскиот претседател Румен Радев, а во организација на Меѓународната фондација за соработка и културен натпревар „Гоце Делчев“ од Бугарија, на 4 февруари во Софија требаше да се одржи заедничко чествување на 153-годишнината од раѓањето на македонскиот револуционер Гоце Делчев. Планиран беше заеднички свечен концерт со класична музика и поезија. Учесниците од Македонија го откажаа учеството, објави МКД.
Пред повеќе од една недела уметниците Валентина Божиновска и Илина Митревска добија покана за учество на овој свечен концерт. Божиновска требаше да рецитира поезија, а Митревска, сопран, требаше да биде дел од концертот на Софискиот симфониски оркестар.
Во изјавата за МКД.мк Божиновска вели дека од организаторот добиле информација дека на концертот ќе учествуваат и официјални македонски претставници и дека со задоволство ја прифатиле поканата.
„Требаше да се одржи културен настан меѓу двете држави, на кој требаше да бидат присутни и официјални претставници од Македонија. Нешто слично како што беше и гостувањето на МОБ во Софија. Откако дознавме дека никој од официјалните претставници на Македонија нема да дојде, решивме да го откажеме нашето присуство. Ние остануваме со нашиот народ и за тоа ги известивме и организаторите“, вели Божиновска во изјавата за МКД.мк.
Од фондацијата веќе и официјално го најавија настанот со информација дека на концертот ќе учествуваат Илина Митревска – сопран од Македонија, Нели Динева – сопран од Бугарија, Валентина Божиновска – поезија од Македонија, Елисавета Шапкарева – поезија од Бугарија, Љупка Биаџони-Гутенберг – диригентка од Германија и Софискиот симфониски оркестар. На концертот биле поканети членови на националните собранија на Бугарија и Македонија, како и на бугарската и на македонската влада, и претседателката на Македонија Гордана Сиљановска-Давкова.
Од македонската влада велат дека до нив не пристигнало официјално барање за заедничко чествување и дека такво нешто не е предвидено. Агендата на премиерот Христијан Мицкоски веќе одамна била утврдена и тој на 4 февруари ќе ја предводи владината делегација што ќе оддаде почит на гробот на Гоце Делчев во црквата Св. Спас во Скопје.
Претседателката Сиљановска, по повод роденденот, на 4 февруари ќе биде во Штип на заеднички активности на универзитетот „Гоце Делчев“.
И неколку македонски пратеници и одговориле дека таква покана до денеска не добиле.
© Vecer.mk, правата за текстот се на редакцијата
