Европската комисија објави дека новите правила за безбедност на возилата стапуваат во сила на 7 јули 2026 година. Според овие регулативи, сите нови патнички автомобили и комбиња кои се пласираат на пазарот на Европската Унија мора да бидат фабрички опремени со напредни системи за заштита на возачот, патниците, но и на најранливите учесници во сообраќајот – пешаците и велосипедистите.
Главната цел на Брисел е преку развој и имплементација на интелигентни технологии да се креираат „попаметни“ возила кои активно ќе придонесат за зголемување на безбедноста и драстично намалување на бројот на сообраќајни несреќи.
Според новите стандарди, секое ново патничко и лесно комерцијално возило ќе мора задолжително да поседува:
- Напреден систем за автоматско сопирање во случај на опасност (кој навремено препознава пешаци и велосипедисти)
- Систем за предупредување при одвлекување на вниманието или дефокус на возачот
- Подобрена видливост пред самото возило
- Проширена површина на безбедносно стакло со цел поголема заштита на пешаците при евентуален судир
Дополнително, регулативата воведува и комплетно нови, поригорозни тестови за безбедност кои се однесуваат на употребуваните гуми.
Европската комисија нагласува дека технолошкиот напредок денес овозможува автомобилите активно да му помагаат на човекот зад воланот и да спречуваат кобни грешки. Овие измени се клучен дел од долгорочната и сеопфатна европска стратегија, чија крајна цел е целосно искоренување на сообраќајните несреќи со фатални последици и тешки повреди во годините кои следат.
© Vecer.mk, правата за текстот се на редакцијата
