Среде шпицот на летната сезона, туристите кои утрово тргнаа кон грчките плажи се соочија со дополнителни задржувања на граница. Причина е четиричасовниот предупредувачки штрајк на грчките царински службеници, поради кој е забавен сообраќајот на сите три гранични премини меѓу Македонија и Грција, со најголем притисок на „Богородица - Евзони“.
Ограничувањата ги опфаќаат премините Евзони, Дојрани и Ники, односно „Богородица“, „Дојран“ и „Меџитлија“. Според информацијата што ја објави македонското МВР, патничките возила за време на протестот се пропуштаат во интервали од десет минути, додека товарниот сообраќај е целосно запрен во двата правци. Македонските гранични служби работат редовно, а застојот зависи од динамиката на грчката страна.
Во објавените информации има разлика во наведениот термин. Македонското МВР информираше за ограничувања од 5 до 9 часот по македонско време, додека грчката Федерација на транспортни оператори, повикувајќи се на известувањето на царинскиот синдикат, наведува четиричасовен прекин од 7:30 до 11:30 часот по грчко време. Независно од временската разлика во известувањата, за патниците најважно е дека забавениот проток може да продолжи и по формалното завршување на штрајкот, додека не се расчистат натрупаните колони.
Протестот не е насочен само кон граничните премини со Македонија. Штрајкуваат вработените во сите грчки царински служби што работат 24 часа, вклучувајќи ги царинските пунктови на копнените граници, како и службите на пристаништата и аеродромите. Од транспортниот сектор предупредуваат дека по продолжувањето на работата може да се создаде втор бран на метеж, бидејќи во исто време ќе треба да бидат обработени возилата што чекале за време на прекинот.
Зад денешните колони стои подолг спор меѓу грчките цариници и Независната управа за јавни приходи. Вработените бараат исплата и навремено обезбедување средства за прекувремена, ноќна и сменска работа, како и за работа во недели и за време на празници. Синдикатот тврди дека дел од цариниците продолжуваат да работат без обезбедена исплата и дека проблемот трае повеќе од една деценија. На локалните синдикални организации им е препорачано и судски да ги побаруваат неисплатените надоместоци за 2024, 2025 и 2026 година.
Грчките цариници предупредуваат и на недостиг од кадар. Претставници на синдикатот тврдат дека во дел од службите прекувремената работа повеќе не е исклучок, туку секојдневие, а пензионирањата побрзо ги празнат работните места отколку што се реализираат најавените нови вработувања.
© Vecer.mk, правата за текстот се на редакцијата
