Бугарските пратеници денеска го изгласаа Кирил Петков, бизнисмен образован на Харвард, за нов премиер и ја одобрија неговата широка коалициска влада, ставајќи крај на повеќемесечната политичка блокада во најсиромашната земја-членка на ЕУ.
Петков, чија нова центристичка партија Продолжуваме за промени (ПП) победи на третите избори во Бугарија во ноември, освои јасно мнозинство од 134 гласови од вкупно 240.
Тој ќе ја води коалицијата со социјалистите, антиестаблишментот ИТН и централнодесничарската партија Демократска Бугарија, под мотото „нулта толеранција за корупцијата“.
„Ќе инсистирам на разоткривање на корупцијата од најниските до највисоките нивоа“, рече Петков во парламентот пред гласањето, повикувајќи ги сите пратеници да ги поддржат законските измени потребни за реформи во судството.
Владата на новиот премиер ја сочинуваат противници на поранешниот премиер, а тој ветува дека ќе го зголеми економскиот раст на повеќе од 5 проценти годишно. Го очекуваат предизвици, почнувајќи од високите трошоци за енергија и ниската вакцинација против коронавирус до подготовките за воведување на еврото во 2024 година.
Петков вети дека ќе ја продлабочи интеграцијата на Бугарија во ЕУ и НАТО и ќе ги интензивира разговорите со Македонија за да се реши историскиот спор околу кој Софија ја блокира Македонија да ги отвори преговорите за пристап во ЕУ.
© Vecer.mk, правата за текстот се на редакцијата
