Рускиот милијардер Константин Иванович Струков, кој е на меѓународните листи со санкции, бил запрен на аеродромот во Тиват додека се обидувал да ја напушти Црна Гора и да отпатува за Белград, дознава подгоричкиот „Вијести“ од неколку независни извори.
Според тие информации, надлежните органи покренале постапка за донесување одлука за забрана за влез во Црна Гора. Откако неговиот лет за Белград бил одложен, Струков дал изјава пред службениците на Секторот за гранична полиција, по што му било дозволено да ја напушти земјата.
Како што му било кажано на „Вијести“, одлуката за забрана за влез ќе му биде доставена на домашна адреса подоцна.
Кој е рускиот милијардер Константин Струков?
Струков е еден од најпознатите руски милијардери во рударството и сопственик на „Јужуралзолото“, еден од најголемите производители на злато во Русија.
Според податоците од меѓународната база на податоци OpenSanctions, неговото име е во евиденцијата на неколку земји кои му вовеле санкции.
На таа листа се наоѓаат Соединетите Американски Држави, Европската Унија, Велика Британија, Швајцарија, Украина, Јапонија, Канада, Австралија и Нов Зеланд. Неговото име е евидентирано и во регистрите за санкции на Монако, Франција и Белгија, а дел од тие записи се однесуваат на спроведувањето на санкциите на Европската Унија.
Украинскиот државен регистар наведува дека Струков е сопственик на компанијата „Јужуралзолото“, како и на рудник за јаглен, и го поврзува со економски структури од стратешко значење за Русија.
Инвестиција во Луштица: Хотел со пет ѕвезди или приватен комплекс?
Инвестицијата на Струков во заливот Добра Лука, во областа Луштица, во опфатот на месноста Кочишта-Бргули, во општина Херцег Нови, привлекува посебно внимание.
Според јавно достапната документација на општина Херцег Нови, Константин Струков во 2018 година бил наведен како раководител на проектот за изградба на туристичкиот центар Т1, чиј централен објект требало да биде петѕвездениот хотел „Добра Лука“ со придружни содржини.
Станува збор за проект на исклучително атрактивна локација, веднаш до морскиот брег, за кој се спроведени процедурите за добивање на потребните одобренија и изработка на техничка документација.
Според достапните информации, Струков претходно го купил земјиштето од „Навигатор Фајнанс“ ДОО. Наводната вредност на трансакцијата била 5,4 милиони евра, заедно со правата од претходно стекнатите градежни документи.
Сепак, прашањето што заслужува посебно внимание е дали вистинската намена на комплексот е во согласност со неговата формално претставена туристичка функција.
Според достапните информации, постои сомневање дека хотелот со пет ѕвездички служел како формална рамка за реализација на комплекс што во пракса би можел да се користи како приватна луксузна резиденција.
© Vecer.mk, правата за текстот се на редакцијата
