Ново истражување покажа дека возраста на која сте го имале првиот интимен однос може да биде поврзана и со квалитетот на стареењето, вклучувајќи ја слабоста на организмот и лошите индикатори за долговечност во староста.
Истражувачите од Универзитетот Шандонг во Кина анализирале голема генетска база на податоци за да пронајдат ДНК маркери поврзани со возраста на која луѓето го имаат својот прв интимен однос. Потоа провериле дали луѓето со генетски варијанти поврзани со порано или подоцнежно сексуално искуство покажуваат разлики во здравјето и квалитетот на животот во староста.
Според резултатите, лицата со генетски сигнали поврзани со порано губење на невиноста имале поголема веројатност да имаат помалку поволни исходи поврзани со возраста, вклучувајќи поголема слабост и послаби мерки за долговечност.
Истражувачите потоа анализирале 145 можни фактори што би можеле да ја објаснат оваа врска, а 34 од нив биле издвоени за подетално испитување.
Водечкиот автор на студијата, Каиксиан Ванг, изјавил дека индексот на слабост, чувството на незадоволство, хроничната опструктивна белодробна болест и АДХД играле важна улога.
– Нашите резултати не значат дека еден модел на однесување го одредува идното здравје на една личност. Наместо тоа, тие покажуваат како раните животни искуства можат да се групираат со проблеми со менталното здравје, ризици од хронични болести и функционално опаѓање со текот на времето – нагласи тој.
Авторите на истражувањето наведуваат дека резултатите укажуваат на важноста од рано препознавање на здравствените ризици и обезбедување поддршка на адолесцентите.
© Vecer.mk, правата за текстот се на редакцијата
