Англискиот музичар и продуцент Вилијам Орбит, најпознат по тоа што беше копродуцент на наградуваниот албум на Мадона „Ray of Light“ од 1998 година, како и на хитовите на групата All Saints „Pure Shores“ и „Black Coffee“, почина на 69-годишна возраст, потврди неговото семејство во соопштение објавено на неговиот официјален профил на Инстаграм.
Орбит во текот на кариерата соработуваше со бројни големи музички имиња, меѓу кои Beth Orton, Blur, All Saints, U2, Pink, Robbie Williams и Britney Spears. Во поново време ги продуцираше песните „After All“ на групата All Saints, како и „Testament in Motion“ од албумот „Testament“.
Со Мадона соработуваше на албумот „Ray of Light“, а повторно се здружија и на нејзините проекти „Music“ и „Beautiful Stranger“, како и подоцна на албумот „MDNA“ од 2012 година. За Pink ја продуцираше песната „Feel Good Time“, која се најде на саундтракот за филмот „Charlie’s Angels: Full Throttle“, додека за албумот на Britney Spears „Britney Jean“ од 2013 година ја продуцираше песната „Alien“.
„Искрено, целиот живот го доживувам како една голема импровизација! Едноставно е така. Но, кога создаваме песна, никој од нас всушност ја нема таа јасност за да размислува за тоа како еден ден ќе гледаме на сето тоа. Затоа времето е секогаш сегашниот момент. Кога денес ќе се осврнам назад, задоволен сум со поголемиот дел од она што сум го направил“, изјави Орбит во интервју за The Talks.
© Vecer.mk, правата за текстот се на редакцијата
