Германија ќе се вооружи со експлозивни беспилотни летала, изјавија денеска два неименувани извори од Министерството за одбрана, додека Берлин се обидува да ја достигне технологијата која се покажа како многу деструктивна во Украина.
Стекнувањето на вакви беспилотни летала во Германија е контроверзно прашање, бидејќи некои политичари ги поврзуваат со убиства извршени од американските сили во Авганистан, според Ројтерс.
Поминаа неколку години пред да биде одобрена употребата на вооружен голем дрон како што е Херон ТП по парламентарната дебата во 2022 година.
Поради потребата од модернизација на германската армија и сомневањата за идната американска воена заштита, минатиот месец парламентот ги одобри плановите за доделување стотици милијарди евра за одбрана.
Според изворите, во наредните денови ќе бидат потпишани договори со две компании кои ќе испорачуваат експлозивни дронови.
Тие не сакаа да ги именуваат компаниите, но Армијата, воздухопловните сили и морнарицата ќе ги тестираат во наредните месеци.
Целта на Германија ќе биде да потпише долгорочни договори за производство на повеќе беспилотни летала до крајот на годината, што ќе го скрати периодот на воведување на ново оружје во употреба, што обично трае со години, наведува Ројтерс.
© Vecer.mk, правата за текстот се на редакцијата
