Рускиот министер за надворешни работи Сергеј Лавров изјави дека НАТО непромислено и бесрамно одбива да ја признае вистината. Како што наведе, на Михаил Горбачов и на Борис Елцин им ветиле дека нема да има проширување на исток, иако има повеќе од доволно докази дека лажат.
„Почитувани американски, германски и британски политичари од таа ера се цитираат себеси и нивните колеги во своите мемоари, со што потврдуваат дека дале усни, но цврсти гаранции“, рече Лавров на форумот „Примаков ридингс“.
Тој потсети на зборовите на еден британски политичар, учесник во тој процес, кој во своите мемоари напиша: „Да, го ветивме, но тогаш никој не размислуваше за исполнување на тие ветувања, едноставно беше потребно да се смири ситуацијата“.
Лавров додаде дека Русија не заборавила дека имало и пишани обврски за непроширување на НАТО, потпишани на највисоко ниво.
„Го имам предвид самитот на ОБСЕ во Истанбул во 1999 година, кога беше поставена темата за неделивоста на безбедноста“, рече Лавров и додаде дека станува збор за тоа што ниту една земја или организација не може да ја зајакне својата безбедност во областа на ОБСЕ на сметка за слабеење на безбедноста на другите.
„Но, ниту тие обврски не функционираат“, посочи тој. Според него, проширувањето на НАТО и натаму е главниот мотив не само во однос на Русија, туку и на другите земји.
„Проширувањето на НАТО е сè уште, како што беше, главниот движечки мотив на Западот во однос не само со Русија, туку и со земјите од постсоветскиот простор, земјите од поранешниот Варшавски пакт што Алијансата веќе ги има проголтана, но и во други земји и региони во светот“, рече министерот.
Рускиот министер рече дека глобализацијата на американски начин е завршена и дека сега се гради нов систем кој не треба да зависи од каприците на Западот.
Тој додаде дека Русија не сака да се задржува на илузии дека Западот, кој ја докажал својата неверодостојност, неспособност да постигне договор и измама, совесно ќе учествува во процесот на глобализација и нема да го злоупотребува. Како што рече Лавров, Русија има вистински партнери во рамките на БРИКС, ШКО, ЗНД и Евроазиската економска заедница. Шефот на руската дипломатија изјави и дека Москва не ја разбира трагичната моментална ситуација во меѓународните односи.
„Ние не ја гледаме моменталната ситуација во меѓународните односи како трагична, мислам дека тоа е трагедија за западната цивилизација, западниот светски поредок“, рече тој.
