Владејачките партии во Германија се согласија за нов модел за воена служба што ја комбинира доброволната служба со можноста за задолжителна регрутација доколку безбедносните потреби го бараат тоа, соопштија германските коалициски партнери.
Договорот е постигнат меѓу конзервативците на канцеларот Фридрих Мерц и социјалдемократите (СПД), објави Ројтерс.
Според предложениот план, на сите 18-годишници ќе им биде даден прашалник за нивниот интерес за воен рок.
Ќе се воведе и систем на регистрација и медицински прегледи, почнувајќи од оние родени во 2008 година.
Доброволните регрути ќе добиваат месечна плата од 2.600 евра, а секоја задолжителна регрутација ќе биде предмет на посебно гласање во Бундестагот.
Германија имала речиси 500.000 војници за време на Студената војна, но бројот на силите е намален во мирно време.
Денес, Бундесверот има околу 182.000 војници, а владата планира да го зголеми тој број на помеѓу 255.000 и 270.000, со дополнителни 200.000 резервисти. Мерц вети дека Германија ќе изгради „најсилната конвенционална армија во Европа“, наведувајќи ги растечките закани од Русија и притисокот на САД врз Европа да преземе поголема одговорност за сопствената одбрана.
© Vecer.mk, правата за текстот се на редакцијата
