Украина ќе побара дополнителни 20 милијарди долари од своите сојузници за да ја зацврсти моменталната предност на бојното поле, открива висок украински претставник од одбраната за POLITICO. Барањето официјално ќе биде поднесено на 18 јуни на состанокот во формат „Рамштајн“, при што од сојузниците ќе се бараат суми од 2 до 6 милијарди долари, во форма на помош или заем.
„Сите гледаат дека Русија гори, а ние сакаме да гори уште повеќе, но за тоа ни треба финансирање. Прозорецот на можности брзо се затвора бидејќи Русија брзо се прилагодува и иновира“, изјави анонимниот функционер.
Ако парите бидат одобрени, тие ќе се додадат на веќе ветените 38 милијарди долари воена помош за оваа година и ќе се искористат за:
- Системи за противвоздушна одбрана, беспилотни летала и муниција.
- Опрема за електронско војување и системи со голем дострел.
- Директни купувања од домашните украински одбранбени компании.
Киев веќе неколку месеци води жестока офанзива со дронови која успешно ги уништува руската логистика, рафинерии и фабрики длабоко во руска територија. Претседателот Володимир Зеленски потврди дека украинските беспилотни системи успешно ги погодуваат клучните цели на непријателот на стотици километри оддалеченост, што го принуди и Владимир Путин да побара итно засилување на руската ПВО.
Реакција од Москва
Портпаролката на руското Министерство за надворешни работи, Марија Захарова, остро го критикуваше новото барање на Киев:
„Секој пат приказната е иста: 'На Киев му требаат повеќе пари'. Ако некогаш треба да се илустрира поимот 'политичко самоповредување', ова е најдобриот пример“.
Ова прашање ќе биде и една од главните теми на самитот на НАТО во Анкара во јули, каде целта е вкупната билатерална помош за Украина да достигне 60 милијарди долари. Украина моментално троши околу 40 отсто од својот БДП за одбрана, што е највисоко ниво во светот.
© Vecer.mk, правата за текстот се на редакцијата
