Денеска, Комитетот за надворешни работи при Европскиот парламент ќе го разгрне и гласа Извештајот за напредокот на Македонија, чие изготвување го водеше известувачот Томас Вајц. Од македонска страна се очекува јасна и недвосмислена поддршка за јазикот и идентитетот, без поставување нови услови.
Почетокот на оваа постапка беше поместен од претходно најавениот датум, бидејќи Вајц побара одложување поради интензивниот притисок од одредени бугарски европратеници, кои бараа ревидирање на формулациите поврзани со македонскиот јазик и идентитет. Вајц нагласи дека сите пратенички групи беа вклучени при изработка на документот и дека не треба да стане плен на билатерални препреки.
Во јавноста излезе и премиерот Христијан Мицкоски, кој истакна дека имало обиди за менување на македонскиот идентитет преку предлози за користење поими како „модерен“ или „сегашен“ македонски јазик.
Тој уште додаде дека најголем дел од членовите на Европскиот парламент стојат зад Македонија и се против обидите за блокирање. Според утврдената агенда, Комитетот за надворешни работи ќе започне со работа во 9:00 часот, а извештајот на Вајц е првата точка. Досега се поднесени повеќе амандмани од бугарски европратеници, од кои некои дури бараат извештајот да не влезе на дневен ред.
© Vecer.mk, правата за текстот се на редакцијата
