Тој го повика американскиот претседател Доналд Трамп да побара од Израел да ги почитува условите на договорот. Инцидентот се случи вчера, а командантот Раед Саед и тројца негови соработници биле убиени, објави Ројтерс.
Илјадници поддржувачи на Хамас ги преплавија улиците на Газа за да ги испратат Саед и неговите соработници. Собраните, извикувајќи „Мачениците му се драги на Бога“, носеа ковчези покриени со зелени знамиња на Хамас. Тоа беше еден од најголемите демонстрации на сила на групата откако во октомври стапи на сила прекинот на огнот, посредуван од САД.
Предупредување на Хамас до Израел
Во телевизиско обраќање од егзил, Халил ал-Хаја го потврди убиството на Саед, највисоко рангираниот функционер на Хамас убиен откако започна прекинот на огнот. „Континуираните израелски кршења на договорот за прекин на огнот и најновите убиства насочени кон Саед и други ја загрозуваат одржливоста на договорот“, рече Хаја.
„Ги повикуваме медијаторите, а особено главниот гарант, американската администрација и претседателот Доналд Трамп, да работат на тоа да го обврзат Израел да го почитува и да се обврзе на прекинот на огнот.“
Кој беше убиениот командант?
Извори од Хамас го опишуваат Саед како втор човек во командниот синџир на вооруженото крило на групата, веднаш зад Изелдин Ал-Хадад. Израел, од друга страна, го смета за еден од клучните архитекти на нападот врз Израел на 7 октомври 2023 година, со што започна војната.
Откако Израел го уби лидерот на групата, Јехја Ал-Синвар, во 2024 година, Хамас не назначи нов лидер. Наместо тоа, групата е предводена од петчлен совет, чиј член е Ал-Хаја.
Неизвесната иднина на Газа
Откако прекинот на огнот стапи на сила, израелските сили го контролираа депопулираниот источен дел од Газа, додека Хамас повторно воспостави контрола врз западниот дел, каде што речиси целото население на енклавата од над два милиони луѓе живее во урнатини.
Завојуваните страни сè уште не се согласиле за следните чекори. Израел инсистира на разоружување на Хамас и негово исклучување од која било идна администрација во Газа. Хамас, од друга страна, вели дека нема да се откаже од своето оружје и бара целосно повлекување на израелските сили.
Спогодбата предвидува распоредување на Меѓународни сили за стабилизација под мандат на ОН. Хаја изјави дека нивната улога треба да биде ограничена на одвојување на страните на границата со Газа, надвор од самата територија.
Нови знаци на нестабилност
Централната команда на САД (CENTCOM) ќе биде домаќин на конференција во Доха на 16 декември, каде што ќе планираат воспоставување на овие сили со партнерски земји, потврдија американски претставници за Ројтерс. Во исто време, во централниот дел од Појасот Газа, вооружени лица го убија Ахмед Замзам, висок офицер во службата за внатрешна безбедност на Хамас, задолжен за борба против соработката со Израел.
Министерството за внатрешни работи на Газа ги опиша напаѓачите како „соработници кои дејствуваат по израелски наредби“ и објави дека е уапсен еден осомничен. Ројтерс не можеше независно да ги потврди обвинувањата, а израелската војска немаше коментар.
© Vecer.mk, правата за текстот се на редакцијата
