Двегодишниот Итан Ивс-Грифитс од Велс починал во болница два дена откако службите за итна помош биле повикани во домот на неговите баба и дедо, 47-годишниот Мајкл и 46-годишната Кери Ивс, во август 2021 година. Судот во Молде ги сослуша обвинувањата дека момчето било „предмет на злоупотреба и занемарување“ и дека членови на неговото најблиско семејство се одговорни за неговата смрт.
Мајкл и Кери Ивс го негираат убиството и ја обвинуваат својата ќерка, Шенон Ивс (28), мајката на момчето, која исто така е на обвинителната клупа под сомнение дека ја предизвикала смртта на момчето, пишува Метро.
Обвинителката Каролин Рис КЦ ѝ рече на поротата дека Шенон и нејзиниот син живееле во куќата на нејзините родители во периодот пред трагедијата.
„Времето што Итан го помина со неговите баба и дедо беше многу несреќно. Тој беше цел на нивно физичко и емоционално злоставување“, рече Рис. Таа додаде дека момчето било „тивко, повлечено, многу слабо и измачувано“.
Според експертот, момчето претрпувало болка, страдање и стрес со денови и недели пред неговата смрт. Кобната вечер, на 14 август, тој бил со своите баба и дедо на приземјето од куќата, додека неговата мајка била горе и разговарала по телефон. Обвинителот тврди дека таа вечер врз момчето бил извршен „насилен напад“, што претставувало кулминација на континуираното злоставување.
Мајкл и Кери Ивс ѝ тврделе на полицијата дека Итан одеднаш се онесвестил. Сепак, според обвинителот, „бабите и дедовците се заколнати на молчење и се обидуваат да ја прикријат вистината за тоа што се случило таа вечер“. Наместо да ја признаат вистината, тие решиле да ја обвинат сопствената ќерка, нагласи Рис.
Мајката Шенон изјавила на полициското испрашување дека се плашела од своите родители и дека ги сметала за насилни. Таа изјавила дека ги видела како постојано го тресат малиот Итан од лутина, особено плашејќи се од неговиот татко. Судот, исто така, слушна дека бабата Кери чекала речиси 20 минути за да повика брза помош откако детето се онесвестило. Повикот бил направен дури во 21:21 часот.
Момчето прво било префрлено во болницата „Грофицата Честер“, а потоа во детската болница „Алдер Хеј“ за операција на мозок. Тој бил прогласен за мртов на 16 август во 18 часот.
Обдукцијата утврдила дека Итан претрпел тешки и фатални повреди на главата, бил драстично неухранет и бил покриен со модринки. Тој тежел само 10 килограми, а лекарите регистрирале дури 40 надворешни повреди. Повредите на главата укажуваат на намерна сила, веројатно со силно тресење, а откриени се и абдоминални повреди кои биле резултат на силни удари.
Судот, исто така, прегледал снимки од безбедносните камери пред семејната куќа, на кои се гледа како дедото на момчето го држи Итан за надлактицата „како партал“, го удира и насилно го става во автомобил. Во друго видео, Итан е на трамболина додека неговиот дедо ги става рацете на главата – гест што, според обвинителот, служел како метод на „дисциплина“.
„Овие видеа се навистина потресни и ни даваат увид во тоа колку трауматични беа последните неколку недели од животот на Итан“, рече обвинителот Рис.
Мајкл и Кери Ивс од Гарден Сити се изјаснија за невини по обвиненијата за убиство, како и по алтернативните точки на обвинението за предизвикување смрт на дете и суровост кон малолетно лице. Шенон Ивс, од Молд, негира дека ја предизвикала или дозволила смртта на нејзиниот син и ги негира обвинувањата за суровост.
Рочиштето продолжува во понеделник, а се очекува судењето да трае шест недели.
© Vecer.mk, правата за текстот се на редакцијата
