Замената на началникот на Генералштабот на американската армија, генерал Ренди Џорџ, и генералот Дејвид Ходни ги изненади воените лидери и предизвика длабока загриженост кај одбранбените претставници. Се поставуваат прашања за последиците од оваа одлука врз војната во Иран, како и врз долгорочниот план за воведување нови технологии и тактики во армијата, пишува Аксиос.
Ненадејна промена на двајца генерали
Џорџ и Ходне се најновите во низата генерали и високи офицери што ги отпушти министерот за одбрана Пит Хегсет. Овие ненадејни заминувања го преобликуваа врвот на Здружените началници на генералштабови, разузнавачките агенции и клучните борбени команди.
Според изјавите на двајца американски претставници, отпуштањето на Џорџ наводно било резултат на судир на ликови, а не на несогласување околу стратешката насока на Армијата. Еден од нив ја опиша промената во средината на војната како „луда“.
На крајот од минатата година, генерал Ходне беше назначен за началник на новоформираната Команда за трансформација и обука (T2COM), чија цел беше да се забрза развојот и примената на новите технологии. Таа организација произлезе од Иницијативата за трансформација на армијата, која Џорџ помогна да се води.
„Ова не изгледа како особено силна и самоуверена одлука“, коментираше еден од службениците за потегот на Хегсет.
Одлука во средината на конфликтот
Промените доаѓаат во чувствително време, бидејќи делови од елитната 82-ра воздушно-десантна дивизија на армијата се распоредени на Блискиот Исток. Копнените сили се исто така задолжени за интегрирана противвоздушна и противракетна одбрана во регионот.
„Значи, имате генерал со четири ѕвездички кој активно работи на доставување опрема и луѓе на бојното поле - за заштита на американските сили - и го отпуштате? Во средината на војна?“, изјави трет американски функционер за Аксиос.
На 20 март, во интервју за Аксиос, генералот Џорџ нагласи дека војната во Иран ја истакнува потребата од зајакнување на домашното производство на оружје.
„Сè се сведува на тоа како можеме да ги произведуваме овие работи побрзо“, рече тој во тоа време.
„И тоа важи за сè - не само за пресретнувачите. Секоја ракета. Сè што правиме.“
Неизвесност околу наследникот
Генералот Кристофер ЛаНев ја презема вршителската должност на Џорџ. Претходно тој беше помошник на Хегсет, а неодамна беше именуван за заменик-началник на Генералштабот на Армијата, позиција што остана празна по ненадејното пензионирање на генералот Џејмс Мингус.
Според еден американски функционер, ЛаНев претходно изразил сомнежи дека Армијата се движи „пребрзо и предалеку“ со реформите. Судбината на Командата T2COM, формирана само пред неколку месеци, сè уште е нејасна. Фотографијата на генералот Ходни како командант сè уште беше на официјалните страници во петок наутро.
„Њујорк пост“ објави што стои зад отпуштањето на генералот од американската армија
Наводното сомневање на американскиот министер за одбрана Пит Хегсет дека секретарот на армијата Ден Дрискол би можел да го замени на позицијата придонесе за разрешувањето на врвниот генерал на армијата, објави „Њујорк пост“, повикувајќи се на американски претставници.
Во четврток, Хегсет побара оставка од началникот на Генералштабот на американската армија, генерал Ренди Џорџ - близок соработник на Дрискол - за време на тековниот конфликт на Блискиот Исток, без да даде јавно објаснување за одлуката.
„Сето тоа е поттикнато од несигурноста и паранојата што Пит ја разви по аферата „Сигналгејт“. За жал, тоа е поттикнато од некои од неговите најблиски соработници кои треба да ја смируваат ситуацијата“, рече еден функционер, осврнувајќи се на групната преписка на Хегсет од март 2025 година со претставници за национална безбедност, во која погрешно бил вклучен новинар и можело да содржи класифицирани информации.
Други генерали беа исто така разрешени
Уште двајца генерали беа исто така разрешени како дел од смените - генералот Дејвид Ходни, кој ја водеше Командата за трансформација и обука, и генерал-мајор Вилијам Грин од Корпусот на капелани на армијата, со кратко објаснување од Министерството дека „време е за промена во раководството“.
Извор близок до администрацијата на претседателот Доналд Трамп изјави дека постои сериозен конфликт меѓу Хегсет и Дрискол и дека Белата куќа му кажала дека во моментов не може да го замени Дрискол.
„Хегсет е многу загрижен за можноста да биде заменет и знае дека Дрискол е еден од главните кандидати за негов наследник. Затоа ги таргетира сите што ги смета за блиски до Дрискол“, додаде изворот.
Дрискол, пријател на Венс и потенцијален наследник
Дрискол е долгогодишен пријател на потпретседателот Џ.Д. Венс; тие студирале заедно на Правниот факултет во Јеил откако служеле во војната во Ирак. Неговото име веќе беше споменувано како потенцијална замена за Хегсет, а загриженоста на министерот дополнително се зголеми кога Дрискол ја презеде улогата на преговарач во војната меѓу Русија и Украина.
Од самиот почеток на својот мандат, Хегсет се соочи со низа контроверзии што ја потресоа неговата позиција во Пентагон. Некои извештаи сугерираат дека Трамп може да го обвини за неуспехот на војната со Иран во споредба со очекувањата на администрацијата, што дополнително ги зголемува шпекулациите за неговото отстранување.
© Vecer.mk, правата за текстот се на редакцијата
