Националната даночна и царинска администрација (НАВ) на Унгарија објави дека уапсила седум украински државјани, вклучувајќи го и поранешниот генерал на украинската тајна служба.
Според извештаите, НАВ запленила и два оклопни камиони за транспорт на готовина, кои требало да транспортираат вкупно 40 милиони долари, 35 милиони евра и 9 килограми злато од Австрија во Украина, објавува унгарскиот портал Индекс.
Апсењето се случило во четврток, а НАВ сега води кривична постапка под сомнение за перење пари. Порталот наведува дека само оваа година, повеќе од 900 милиони американски долари, 420 милиони евра и 146 килограми златни прачки биле транспортирани во Украина преку територијата на Унгарија.
Националната даночна и царинска администрација веднаш ја известила украинската конзуларна служба кога започнала постапката, но досега не е добиена повратна информација од конзуларната служба.
Поранешен генерал на украинската тајна служба бил одговорен за управување со пратката.
Австрискиот новинар Рихард Шмит напиша на својата страница на социјалните мрежи дека 75 милиони евра и американски долари, како и 9 килограми злато, требало да бидат транспортирани со возила од Рајфајзен банката во Виена до Украина, објавува Индекс и додава дека, според Шмит, унгарскиот премиер Виктор Орбан ја запрел испораката на злато во Украина откако добил закана со смрт.
Според украинскиот новинар Анатолиј Шари, запленетата количина „не била баш обична, благо речено“, а Виктор Орбан го знаел тоа.
„Убеден сум дека парите му припаѓале на Зеленски. Некаков вид злоупотреба. Сепак, денес добив информација дека парите не му припаѓале на Зеленски, туку на неговите европски колеги. Приказната е целосно фантастична, а вчера ми се чинеше нереална. Но, денес, неколку извори известуваат дека Орбан не го нападнал Киев, туку Брисел. Станува збор за 80 милиони евра и околу 10 килограми злато. Брисел знае чии пари се. И затоа, ми се чини, сега прават сè што можат за да спречат избувнување на скандалот. Орбан дејствувал многу прецизно и удрил таму каде што боли“, рече Шари во објава на социјалната мрежа X.
„Украинците се земени како заложници“
Според украинскиот министер за надворешни работи Андриј Сибиха, унгарските власти „практично зедоа заложници“ на седум украински државјани во Будимпешта. Според Сибиха, вработените во Ошчабанка транспортирале готовина помеѓу Австрија и Украина кога биле запрени, а нивното местоположба е непознато оттогаш.
Амбасадата на Украина во Унгарија денес објави на Фејсбук дека украински државјани вработени во Ошчадбанка возеле две банкарски возила кои транзитирале меѓу Австрија и Украина и превезувале готовина како дел од редовна услуга меѓу државните банки.
„Во пракса, станува збор за Унгарија која зема заложници и краде пари. Ако ова е „силата“ за која зборуваше Орбан, тогаш ова е сила на криминална организација. Ова е државен тероризам и уцена“, се наведува во соопштението.
На веб-страницата на Ошчадбанка беше објавено и соопштение во кое тврдат дека седум вработени во финансиската институција биле нелегално приведени во Унгарија. Според нивното соопштение, местото на живеење на луѓето е непознато, но возилата на банката, врз основа на GPS податоци, може да се најдат во центарот на Будимпешта, во близина на една од унгарските безбедносни агенции.
„Транспортот на средства и вредни предмети го изврши Ошадбанка како дел од нејзиниот меѓународен договор со австриската Рајфајзен банка и за негово спроведување. Товарот беше подготвен во согласност со меѓународните правила за транспорт и важечките европски царински процедури. Ошадбанка бара итно ослободување на своите вработени и враќање на нејзиниот имот, како и нивно враќање во Украина“, објави украинската финансиска институција.
Според Телекс, во текот на денот во четврток, Центарот за борба против тероризмот изврши рација во украински возила за превоз на готовина на бензинска пумпа на автопатот М5. Врз основа на нивните информации, мажите облечени во црно биле извлечени од возилото и однесени. Имало неколку сведоци на рацијата. По операцијата, конвојот се упатил кон Будимпешта.
Во четврток, Зеленски му се закани на Виктор Орбан, велејќи дека ќе го даде телефонскиот број на унгарскиот премиер на вооружените сили на Украина ако не го укине замрзнувањето на кредитот од 90 милијарди евра од Европската Унија.
Орбан возврати, велејќи дека верува оти заканите на Зеленски не се однесуваат на него, туку на Унгарија.
Индекс потсетува дека Унгарија има намера да го блокира одобрувањето на кредитна линија од 90 милијарди евра за Украина сè додека не се обнови работата на нафтоводот „Дружба“, преку кој Унгарија сака да увезува руска нафта.
Европската комисија се приклучи на „војната“: Заканите на Зеленски не се прифатливи
Европската комисија денес објави дека заканите на украинскиот претседател Володимир Зеленски до унгарскиот премиер Виктор Орбан се „неприфатливи“.
„Поточно, во врска со коментарите на претседателот Зеленски, ние како Европска комисија сме многу јасни дека таквата реторика не е прифатлива“, изјави портпаролот на Комисијата, Олоф Гил.
Тој додаде дека целта на Комисијата е „сите да се смират и да ги намалат тензиите“ и дека Брисел води „активни разговори со сите страни“ со цел да се реши кризата, пренесува Еурактив.
Украинскиот претседател претходно му се закани на унгарскиот премиер Орбан поради спорот околу заемот од ЕУ што Унгарија го блокираше.
„Се надеваме дека едно лице во ЕУ нема да блокира 90 милијарди евра и дека украинските војници ќе добијат оружје. Во спротивно, ќе им ја дадеме адресата на тоа лице на нашите момци за да можат да зборуваат на нивниот јазик“, рече Зеленски во четврток.
Унгарскиот премиер Виктор Орбан изјави дека не е лично загрижен за заканите со смрт за кои тврди дека му ги испратил претседателот на Украина, Володимир Зеленски, истакнувајќи дека нема да дозволи неговата татковина да биде загрозена.
Орбан нагласи дека спорот околу нафтоводот „Дружба“ не е спор што го засега лично, туку, како што изјави, е за снабдување со енергија на Унгарија.
Тој предупреди дека ќе ги искористи сите политички средства за да ја пробие украинската нафтена блокада. Унгарија го блокира заемот од ЕУ за Украина од 90 милијарди евра за следните две години.
Без овој заем, веќе следниот месец, Украина би можела да се најде без средства од кои зависи функционирањето на државата. Будимпешта ја обвинува Украина дека намерно го отежнува поправањето на нафтоводот „Дружба“, кој е надвор од употреба од 27 јануари.
Министерот за надворешни работи на Унгарија, Петер Сијарто, преку Х побара одговори од Киев во врска со пратските со кеш и злато преку територијата на Унгарија кон Украина,
„Бараме итни одговори од Киев во врска со големите пратки со готовина што минуваат низ Унгарија, што покренуваат сериозни прашања за можна врска со украинската воена мафија.
Од јануари, 900 милиони долари и 420 милиони евра во готовина, како и 146 килограми злато, се транспортирани низ Унгарија. Ако ова навистина е трансакција меѓу банки, зошто не е извршена преку трансфер? Зошто да се преместуваат толку огромни суми во готовина низ нашата земја?
Според Националната даночна и царинска администрација, последната пратка била придружувана од поранешен генерал на украинската разузнавачка служба.
Додека Киев не даде јасни објаснувања за потеклото и намената на средствата, унгарските власти ќе спроведат темелна истрага“, напомена Сијарто.
© Vecer.mk, правата за текстот се на редакцијата
