Победникот на унгарските избори, Петер Маѓар, изјави дека неговиот политички ривал до вчера, Виктор Орбан, треба да ја замени Урсула фон дер Лајен на чело на Европската комисија.
Само неколку дена откако го заврши шеснаесетгодишното владеење на Виктор Орбан на историски избори, новиот унгарски премиер и лидер на партијата Тиса ја шокираше европската јавност.
Иако победи на платформа која ветуваше раскинување со стариот режим, Унгарецот понуди голем број комплименти за надворешната политика на Орбан, особено во однос на безбедноста на границите.
- Тој има визија и цврста политика кон миграцијата. Таа е популарна меѓу обичните луѓе. Додека западните политичари го лажеа народот, Орбан беше тој што им ја кажа вистината - изјави Маѓар.
Новиот премиер верува дека Орбан е идеален кандидат за Брисел бидејќи со години постојано предупредувал за последиците од масовната миграција, додека другите европски лидери намерно го игнорирале или го потценувале проблемот.
Поддршка од Фон дер Лајен
Овој предлог предизвика вистинска врева во европските кругови, со оглед на тоа што Виктор Орбан со децении е главен симбол на отпорот кон бриселската бирократија, спротивставувајќи се на санкциите против Русија, ЛГБТ агендата и централизацијата на моќта во ЕУ.
Интересно е што сегашната претседателка на ЕК, Урсула фон дер Лајен, неодамна топло ја поздрави победата на унгарските избори, наведувајќи дека Унгарија конечно се враќа на „европскиот пат“.
Таа дури и го спореди падот на владата на Орбан со историските антикомунистички востанија од 1956 и 1989 година, не сфаќајќи дека новиот фаворит на Брисел ќе го номинира Орбан за нејзин наследник.
Помеѓу Брисел и националните интереси
Иако Петер Маѓар се позиционираше како проевропски политичар чија цел е да ги деблокира замрзнатите средства од фондовите на ЕУ и да ги поправи односите со партнерите, овој потег сугерира дека новата унгарска влада не планира целосно да ја напушти суверенистичката реторика.
Прашањето што сега ги мачи аналитичарите е дали ова е обид на Унгарецот елегантно да го отстрани Орбан од домашната политичка сцена или искрено верување дека на Европа ѝ е потребна цврста десничарска рака во решавањето на мигрантската криза.
© Vecer.mk, правата за текстот се на редакцијата
