Американскиот претседател Доналд Трамп упати директна и остра наредба до морнарицата на САД да дејствува со сите расположливи средства против пловилата за кои постои сомнеж дека поставуваат мини во стратешки важниот Ормутски Мореуз.
Преку својата социјална мрежа „Truth Social“, Трамп порача дека без никакво двоумење треба да биде уништен секој чамец, без оглед на неговата големина, доколку претставува закана за безбедноста на водите. Во својата објава, претседателот упати и остри критики кон противничката морнарица, тврдејќи дека нивните воени бродови веќе се на дното на морето.
„Наредив на морнарицата на Соединетите Држави да пука и да го уништи секој чамец, колку и да е мал, кој поставува мини во водите на Ормутскиот Мореуз. Без оклевање“, напиша Трамп.
Трамп дополнително информираше дека американските специјализирани единици за разминирање се веќе активни на терен и интензивно го чистат мореузот за да овозможат безбеден премин на бродовите. Овој потег доаѓа во период на екстремно високи тензии, каде што безбедноста на оваа клучна светска рута за транспорт на нафта е под постојана закана.
© Vecer.mk, правата за текстот се на редакцијата
