Врховниот суд на Соединетите Американски Држави денес го отфрли барањето на две компании за играчки да ги забрзаат нивните жалби против царините наметнати од американскиот претседател Доналд Трамп.
Одлуката на Врховниот суд значи дека администрацијата на Трамп сега има стандарден рок од 30 дена за да го поднесе својот одговор на жалбата, објави CNN.
Две мали семејни компании, Learning Resources и Hand2mind, тврдеа дека Трамп немал овластување според Законот за меѓународни економски овластувања во вонредни ситуации (IEEPA) да воведе сеопфатни царини на 2 април.
Компаниите претходно оваа недела побараа од Врховниот суд да го забрза разгледувањето на нивната жалба и да го заобиколи федералниот апелационен суд.
„Со оглед на огромното влијание на царините врз практично секој бизнис и потрошувач низ целата земја, како и континуираните последици предизвикани од неограничената моќ на претседателот да воведува царини, оспорувањата на царините не можат да чекаат на нормалниот жалбен процес“, рекоа компаниите во своето поднесување.
Трамп прогласи национална економска вонредна состојба, според IEEPA, за да го оправда спроведувањето на неговите царини без претходно одобрение од Конгресот, стратегија што предизвика негодување од бизнисите и поединците кои го доведуваат во прашање неговиот авторитет.
Американскиот суд за меѓународна трговија минатиот месец привремено ги блокираше тарифите на Трамп, велејќи дека IEEPA, кој стана закон во 1977 година, не му дава на претседателот овластување да воведува тарифи за увоз.
Но, федералниот апелационен суд претходно овој месец дозволи тарифите на Трамп да останат на сила додека не ги слушне аргументите од неговата администрација за случајот кон крајот на следниот месец.
© Vecer.mk, правата за текстот се на редакцијата
