Утре во Европскиот парламент ќе се гласа за извештајот за напредокот на Македонија, кој го подготви европратеникот Томас Вајц. Од македонската страна се надеваат на јасна и недвосмислена поддршка на македонскиот јазик и идентитет, без дополнителни услови или ограничувања.
Претходно, извештајот беше тргнат од дневен ред на 4 јуни поради инсистирање на Вајц, поради реакции од бугарски европратеници кои не се согласуваа со формулациите околу македонскиот јазик и идентитет.
Документот е изработен во соработка со сите пратенички групи и не треба да биде предмет на блокади поради билатерални спорови.
Македонскиот премиер Христијан Мицкоски истакна дека имало обиди во извештајот да се менува дефиницијата за идентитетот, преку внесување термини како 'модерен' или 'сегашен' македонски јазик.
Мицкоски додаде дека најголем дел од европратениците ја поддржуваат Македонија и се против политиките на опструкции. Според распоредот, седницата на Комитетот за надворешни работи ќе почне од 9 часот, а извештајот на Вајц е прва точка за дискусија.
Бугарските европратеници веќе поднесоа повеќе амандмани – меѓу кои и такви што бараат извештајот да не биде разгледуван воопшто.
© Vecer.mk, правата за текстот се на редакцијата
