„Џиро Ди Италија“ оваа година почнува место во Будимпешта, ќе почне од Торино

Организаторите на велосипедната трка „Џиро Ди Италија“ денеска објавија дека годинашното 104-то издание ќе започне во Торино, најголемиот град во регионот на Пиемонт, а првата етапа ќе биде единечен хронометар на девет километри.

„На 160-годишнината од обединувањето на Италија, Торино и регионот Пиемонт ќе бидат домаќини на големиот почеток на Џиро Ди Италија, а последен пат тоа се случи пред десет години“, се вели во изјавата на организаторите.

Пиемонт ќе биде домаќин на првите три етапи, а велосипедистите ќе се вратат во регионот во финалето кога целта на 19-та етапа ќе биде на врвот на Алпе деи Мера во Валсезија, а претпоследната, 20-та етапа ќе започне од Вербанија. Инаку трката официјално ќе почне на 8 мај, а првично беше планирано стартот да биде во Будимпешта, но поради ковид-кризата унгарските власти не дозволија трката да тргне од унгарската престолнина.