Тренерот на Реал Мадрид, Карло Анчелоти не беше премногу вознемирен по поразот од Ливерпул со 2-0 во Лигата на шампионите. Според него, овој резултат и не е толку важен за пласманот на неговиот тим и се ќе зависи од преостанатите три меча до крајот, во кои ќе треба да го загарантира местото во топ 24 и да продолжи до елиминациите.
„Резултатот е фер. Ливерпул заслужи да победи. Тие се во добар момент, имаат импулс и покажуваат одлична форма. Донесовме неколку лоши одлуки со последното додавање, но генерално бевме добри до пеналот. Задоволен сум од тимот, од одбраната. Имавме предност во четири-пет контранапади, нашиот пристап беше коректен“, смета Анчелоти.
Тој го коментираше и настапот на Килијан Мбапе, кој и понатаму има потешкотии и промаши пенал на овој меч.
„Секој напаѓач има моменти кога не може да постигне гол и е фрустриран. Можеби во моментот му недостасува самодоверба затоа што работите не функционираат како што треба. Понекогаш едноставно треба да играте поедноставно и да не ги комплицирате ситуациите. Тој постигна многу пенали, но нормално е да се промаши понекогаш. Лекот е да се биде трпелив. Добро се адаптира, но мораме да бидеме трпеливи со него бидејќи е извонреден играч“, заклучи специјалистот.
