Ако некогаш работеше со голема добивка, ЈП Водовод и Канализација изминативе години тоне и руши рекорди во загуби. Минатата 2024 година ја зарвршиле со загуба во работењето од рекордни 256 милиони денари, односно околу 4,2 милиони евра.
Ова е наведено во самиот финансиски извештај на најголемото градско претпријатие за годината 2024, пренесе Фактор.
Се наведува дека порано имало и години кога добивката била околу 2 милиони евра,а од работењето на ЈП Водовод и канализација Скопје зависат и приходите на двете комунални претпријатија „Паркови и зеленило“ и „Комунална хигиена“.
Кај наплатата се забележани нешто помали приходи од стопанството, а најголем дел од трошоците се остварени за платите на 1.066 работници како просечен број на вработени во 2024. Вкупните трошоци се зголемиле на 1,9 милијарди денари (31,4 милиони евра) и тие бележат раст од 10,5 отсто споредено со една година претходно.
Претходната година загубата на ЈП Водовод и канализација - Скопје изнесуваше 350.000 евра. Последен пат добивка била прикажана за 2020, тогаш од милион евра
© Vecer.mk, правата за текстот се на редакцијата
