Основното јавно обвинителство Скопје покрена истражна постапка против 25-годишна жена откако пред два дена бил спречен несекојдневен обид за внесување дрога во КПУ „Идризово“.
Осомничената се товари за кривично дело неовластено производство и пуштање во промет наркотични дроги откако кај неа биле пронајдени марихуана и кокаин.
Настанот се случил на 20 мај, кога жената дошла во посета на својот сопруг кој издржува затворска казна. Таа со себе носела две табли во кои на прв поглед биле спакувани 60 јајца. Сепак, при детален преглед на скенер и рачна проверка било утврдено дека дури во 28 од јајцата биле скриени пакувања со дрога.
Пронајдени биле вкупно 318,62 грама марихуана и 142,2 грама кокаин.
Иако обвинителството ја нагласува тежината на делото и постоењето на ризик од бегство, сепак е земена предвид семејната состојба на осомничената.
„Имајќи го предвид фактот дека осомничената е мајка на малолетни деца, од кои едното е 5-месечно бебе, јавниот обвинител достави предлог за определување мерка куќен притвор“,
велат од ОЈО Скопје.
© Vecer.mk, правата за текстот се на редакцијата
