Коалицијата ВЛЕН со јавно соопштение реагира на, како што наведуваат, нов скандал во Општина Гостивар, поврзан со трошење на јавни средства во износ од 450 илјади евра за проект чија реална вредност, според нив, не надминува 50 илјади евра.
Од ВЛЕН оценуваат дека станува збор за сериозна злоупотреба на парите на граѓаните и бараат јавен одговор од актуелниот градоначалник Valbon Limani. Според соопштението, „кога банален проект се продава како капитална инвестиција и се плаќа десеткратно повеќе, веќе не станува збор за административна грешка, туку за отворена злоупотреба“.
Во реакцијата се посочува дека Valbon Limani, како политички наследник на Arben Taravari, го продолжува истиот модел на владеење, за кој, според ВЛЕН, постојат сериозни сомнежи поврзани со:
– надувани цени на проекти,
– инфраструктурни зафати кои не се реализирани на терен,
– тендери без реален ефект,
– услуги кои се платени, но не се видливи.
Како дополнителен проблем, од ВЛЕН го наведуваат и општинскиот долг од околу 30 милиони евра, што, според нив, е директен резултат на неодговорното и нетранспарентно управување со општината.
Во соопштението се најавува дека на 11 јануари граѓаните ќе имаат можност да испратат јасна порака, при што ВЛЕН изразува уверување дека поддршката ќе оди кај Невзат Бејта.
„Гостивар не смее да биде засолниште за политичко преживување и злоупотреби“, порачуваат од ВЛЕН, додавајќи дека актуелната локална власт ја изгубила довербата на граѓаните.
Од Општина Гостивар и од засегнатите функционери засега нема официјална реакција на овие наводи.
© Vecer.mk, правата за текстот се на редакцијата
