Премиерот Мицкоски денес, при тематски состанок со високи претставници на меѓународната иницијатива Партнерство за отворена власт (ПОВ) во присуство на извршниот директор на ПОВ, Аидан Ејакуза, се осврна и на актуелениот безбедносен и кривичен скандал со незаконските следења и прислушкувања кои ги утврди АНБ, а се вршеле од страна на минатата власт на СДСМ и ДУИ.
“Нашата држава се соочува со нов скандал – нелегално прислушкување и масовна злоупотреба на системот во изминатите неколку години.
Јас лично, тогаш како претседател на најголемата опозициска партија, денеска како премиер заедно со новинари, медиуми, бизнисмени и јавни личности сме биле жртва на системот кој ги следел своите граѓани. Ова не е напад само врз мене, туку врз демократијата, врз правото на слобода, врз темелите на државата.
Сакам да порачам: нема да има селективна правда. Ќе има одговорност. Ќе има правна разрешница. Нашиот народ предолго бил жртва на злоупотреби, на корупциски шеми и на тајни центри на моќ. Времето на недопирливи заврши.
Токму затоа партнерството за отворена власт е наш заеднички одговор. Затоа што таму каде што има светлина, нема простор за сенки. Кога институциите се отворени и отчетни, тогаш нема место за злоупотреба, ниту за загрозување на слободите и демократијата.
Овој состанок е доказ дека ние не бегаме од проблемите – ги решаваме.
Ние не се плашиме од предизвици – ги совладуваме.
Нашата визија е да изградиме држава со силни институции, модерна администрација, дигитални услуги достапни за секој граѓанин, со економија што расте и со општество што верува во демократијата.
Верувам дека денешните разговори ќе ни помогнат да го искористиме потенцијалот на отворената власт не само како политика, туку како култура на владеење.
Наша должност е да создадеме систем што ќе биде транспарентен, праведен и ефикасен, систем кој ќе биде во служба на граѓаните и кој ќе го врати достоинството на јавниот интерес.
Денес испраќаме јасна порака: Македонија стои цврсто на патот на реформите, на европската интеграција и на борбата против корупцијата. И од тој пат назад нема“ изјави Мицкоски.
© Vecer.mk, правата за текстот се на редакцијата
